३० ऑगस्ट रोजी न्या. इंदिरा बॅनर्जी, हेमंत गुप्ता, सूर्यकांत, एम. एम. सुंद्रेश आणि सुधांशू धुलिया या पाच न्यायाधीशांच्या खंडपीठाने राष्ट्रीय मानवाधिकार आयोग, राष्ट्रीय महिला आयोग आणि राष्ट्रीय अल्पसंख्याक आयोग यांना जनहित याचिकांमध्ये पक्षकार केले होते आणि या याचिकांप्रकरणी त्यांचे उत्तर मागितले होते. त्यानंतर न्या. बॅनर्जी या २३ सप्टेंबर आणि न्या. गुप्ता १६ ऑक्टोबर रोजी निवृत्त झाले. त्यामुळे या घटनापीठाची पुनर्रचना करण्याचे आदेश देण्यात आले आहे. बहुपत्नीकत्व आणि निकाह हलाला या दोन्ही प्रथांना बेकायदा आणि घटनाबाह्य म्हणूज जाहीर करावे, अशी मागणी वकील अश्विनी उपाध्याय यांनी याचिकेद्वारे केली आहे. या याचिकांप्रकरणी जुलै २०१८ मध्ये घटनापीठ स्थापन करण्याचे आदेश दिले होते. या प्रकरणात फर्जना नावाच्या महिलेने दाखल केलेल्या याचिकेवर सर्वोच्च न्यायालयाने केंद्राला नोटीस बजावली होती आणि उपाध्याय यांच्या याचिकेची घटनापीठाकडून सुनावणी होणार असलेचे स्पष्ट केले होते.
काय आहे बहुपत्नीकत्व आणि निकाह हलाला
बहुपत्नीकत्व : पुरुषांना एकाच वेळी चार विवाह करण्याची परवानगी
निकाह हलाला : घटस्फोटित मुस्लिम महिलेला तिच्या पतीशी पुनर्विवाह करण्यासाठी आधी दुसऱ्या पुरुषाशी लग्न करावे लागते, शारीरिक संबंध ठेवावे लागतात. त्यानंतर नवीन पतीपासून घटस्फोट घेतल्यानंतर पहिल्या पतीशी लग्न करता येते
