डॉ. बाबासाहेब आंबेडकर मराठवाडा विद्यापीठाच्या दीक्षांत समारंभाच्या अध्यक्षीय भाषणात राज्यपाल भगतसिंह कोश्यारी यांनी शिवराय हे जुन्या काळातील आदर्श आहेत, असं वक्तव्य केलं होतं. तर स्वातंत्र्यवीर सावरकरांच्या माफीनाम्यावर बोलताना भाजप खासदार सुधांशू त्रिवेदी यांनी शिवाजी महाराजांनी पाच वेळा औरंगजेबाला पत्र लिहिली, असं म्हटलं. या दोघांच्या वक्तव्याने मोठ वाद निर्माण झाला. राज्यभरात निदर्शने करण्यात आली.
दरम्यान, एका व्हिडिओच्या माध्यमातून कन्नडचे माजी आमदार हर्षवर्धन जाधव यांनी बंदची हाक दिली होती. बंदचे आवाहन करत असताना जाधव यांनी भाजप आणि राज्यपालांविरोधात शिवराळ भाषेचा वापर केला होता. त्यानंतर माजी लोकप्रतिनिधीने अशी भाषा वापरणे योग्य नाही, ही सभ्य भाषा नाही, अशा प्रकारच्या कमेंट करत भाजप कार्यकर्त्यांनी जाधव यांना ट्रोल केले होते. यामुळे भडकलेल्या हर्षवर्धन जाधव यांनी एका चहाच्या हॉटेलमध्ये बसून व्हिडिओ बनवत मी माझ्या वक्तव्यावर ठाम असल्याचं सांगितलं आहे.
दरम्यान, माझ्यामुळे इम्तियाज जलील खासदार म्हणून निवडून आले, अशी टीका भाजपवाले करत आहेत. मात्र राज्यपाल आणि भाजपचे नेते जशी भाषा वापरत आहेत, ती भाषा जलील देखील वापरत नाहीत, असंही हर्षवर्धन जाधव यांनी म्हटलं आहे.
